CASTAGNE di Gianni Raffo

L'ëa 'na giornâ d'autûnno, e in ta frescûa,

faxendo quattro passi in ta natûa,

me son trovou in mëzo a ûn bosco antigo,

dove gh'andâvo spesso co 'n'amigo,

a rûspaggiâ e castagne cheite in tæra,

quand'ëmo ancon figgiêu in tempo de guæra.

A câsa ne-e boggîvan pe disnâ,

con due gambe de fenoggio e ûn pö de sâ.

Me pâ de sentî ancon ciammâ mæ moæ:

"vegnî, l'è pronto in töa, hô fæto e piæ

mangiævene due o træ sensa sprecâ,

che se n'avanse, servan pe çenâ".

Väna illûxion, inûtile speransa,

quande s'ha famme de röba no n'avansa;

e â seia, gh'ëa rostïe pe cangiâ,

pe risparmiâ anche l'ægua, l'êuio e a sâ.

Riveddo ancon mæ poæ co-e fâ ballâ,

in te 'na poæla vëgia e pertûzâ.

O l'è ûn frûto nostrâ, sensa preteize,

ûn frûto fæto in pô comme o zeneize,

serrou drento a 'na rissa, quæxi ascoso,

ma con in chêu tanto dôçe e generoso,

che tanto o n'ha aggiûttou in ti momenti,

quande gh'ëa solo da famme sotta i denti.

Me son accucciou, me n'ho insernûo due o træ,

ma i mæ figgiêu no me l'han manco ammiæ.

 

 

 

Gianni Raffo – Dialetto di Lavagna

Premio Consulta Ligure 2000

 

 

CASTAGNE

 

Era una giornata d’autunno, e nella frescura,

facendo quattro passi nella natura,

mi son trovato in mezzo a un bosco antico,

dove andavo spesso con un amico,

a raspare le castagne cadute in terra,

quand’eravamo ancora bambini in tempo di guerra.

A casa ce le bollivano per pranzo,

con due gambe di finocchio e un po’ di sale.

Mi sembra di sentire ancora chiamare mia madre.

“venite, è pronto in tavolo, ho fatto le pie

mangiatevene due o tre senza sprecare,

che se ne avanzano, servono per cena”.

Vana illusione, inutile speranza,

quando si ha fame di roba non ne avanza;

e la sera c’erano le caldarroste per cambiare,

per risparmiare anche l’acqua, l’olio e il sale.

Rivedo ancora mio padre che le fa ballare,

nella padella vecchi e perforata.

E’ un frutto nostrano, senza pretese,

un frutto fatto un po’ come il genovese,

chiuso dentro a un riccio quasi nascosto,

ma con un cuore tanto dolce e generoso,

che tanto ci ha aiutato nei momenti,

quando c’era solo della fame sotto i denti.

Mi sono accucciato, me ne sono scelte due o tre,

ma i miei bambini, non me le hanno neanche guardate.