ÖTRI di Alessandro Guasoni

Voltri (Ge)
 

Mi son nasciùo de fronte a-o mâ de Ötri

e fòscia m’é arrestòu drento, into sangue,

un pò de vento.

Into vegio San Carlo

mæ moæ a m’à misso a-o mondo, e l’é pe quello

che o vento di Appennin pâ ch’o me ciamme

da-o Santuäio de Graçie e ancon ciù a Nòrde,

onde e voxe di pin in sempiterno

repétan föe antighe de breganti

che deslögia de longo pe-e montagne

mareite da-o Segnô.

D’in çimma i mòuxi

do mâ l’uverno o canta ‘na canson

de veie e de campann-e sensa fin,

de barche veue che vegne chì à stracoâ

in sce l’ænn-a, ‘na seia sensa luxe,

e de andannie de uspiâ, de barcoin ciæi,

che i mòuti stan à ammiâ e giornæ che passa

in sce ‘n mâ sempre pægio, unn-a pe vòtta…

 

 

 

Alessandro Guasoni – Dialetto di Genova

 

 

VOLTRI

 

Io sono nato di fronte al mare di Voltri

e forse m’è rimasto dentro, nel sangue,

un po’ di vento. Nel vecchio “San Carlo”

mia madre mi ha messo al mondo, ed è per quello

che il vento di Appennini sembra che mi chiami

dal Santuario delle Grazie e ancora più a Nord,

dove le voci dei pini in eterno

ripetono fiabe antiche di briganti

che vagano sempre tra le montagne

maledette da Dio. Dalle onde

del mare l’inverno canta una canzone

di vele e di campane infinite,

di barche vuote che vengono qui ad incagliarsi

sulla sabbia, una sera priva di luce,

e di corsie d’ospedale, di finestre chiare,

da cui i malati stanno a guardare le giornate che passano

su di un mare sempre uguale, una alla volta…