A CASA CÔ DE NESPOA di Edordo Firpo

 

Ògni vòtta che emmo da passâ

rasente a-a casa vegia in vista a-o mâ,

– o mâ o l’é quæxi sempre pin de çê

con de scciummette gianche –

ricordemmo i amixi che son stæti

pe tanti anni in quella paxe, fiña

che l’oa ch’a vegniva da-a Castagna*

e a s’allargava à çerci in sciâ campagna,

comme a leva do scangio a l’é scattâ.

 

L’é stæto quande l’unico figgeu

co-i euggi pin de luxe o gh’é mancou.

 

E aloa son andæti via, lontan

da-e muage di so vegi

portando chi sa dove o sò magon.

 

E mi, quello che ciù me fa pensâ,

tornando à questi pòsti,

l’é vedde comme o tempo o l’allivella

tutti i eventi e comme o se sigilla

in sciô relitto comme l’ægua in mâ.

 

Coscì ritorna o sô ògni mattiña

à inluminâ a casa cô de nespoa,

o fî de l’orizzonte in scî çimmelli

e i bastimenti

che scappan d’inte ramme comme öxelli.

 

 

 

Edoardo Firpo – Dialetto di Genova

Tratta da “Poesia in Ligure tra Novecento e Duemila” (1900 – 2018) di Alessandro Guasoni – Edizioni Cofine, Roma, 2019, pag. 44

 

 

LA CASA COLOR NESPOLA  

 

Ogni volta che dobbiamo passare

presso la vecchia casa in vista al mare,

– il mare è quasi sempre pieno di cielo

con piccole schiume bianche –

ricordiamo gli amici che sono stati

per tanti anni in quella pace, finché

l’ora che veniva dalla Castagna*

e si allargava a cerchi sulla campagna,

come la leva dello scambio è scattata.

 

E’ stato quando l’ultimo bimbo

con gli occhi pieni di luce gli è mancato.

 

E allora sono andati via, lontano

dalle mura dei loro vecchi

portando chissà dove il loro dolore.

 

Quanto a me, ciò che più mi fa pensare,

tornando a questi posti,

è vedere come il tempo livella

tutti gli eventi e come si sigilla

sul relitto come l’acqua in mare.

 

Così ritorna il sole ogni mattino

a illuminare la casa color nespola,

il filo dell’orizzonte sugli alberi

e i bastimenti

che scappano tra i rami come uccelli.

 

*Castagna: con questo nome sono conosciuti almeno due cimiteri a Genova.