VOXE DE PRÌE di Renzo Ferrero

In ta pausa de l'ôa

quande a gente a l' ha i pê sotto a töa,

passando pe caxo

pe ciasse deserte e i caroggi scûi

di vëgi quartê a redosso do mâ,

in mëzo a-o silensio se sente parlâ.

Voxe de casa e parlate foreste

s' intressan fra e mûage

de case e de gexe, de portici e logge

bûtteghe e barcoin...

Campetto, San Loenso, Sarzan, San Mattê,

Ciassa Banchi, San Zorzo,

a Commenda de Prê...

Son e voxe de prìe

che contan e stoje e e vëge memoje

do tempo passòu, de secoli fa

e dan voxe a mercanti,

banchê, naveganti,

nobili e damme co-a sò servitû,

sordatti, pescoéi, prexonê levantin,

galiöti, bonëgia, lescaieu, besagnin,...

Rûmô de seuccài de cavalli e de mû

araldi co-e trombe e remoìn de figgieu.

Son queste e voxe che ognidûn pò sentî

in te ciasse deserte e in ti caroggi scûi

in ta pausa de l'ôa

quande a gente

a l'ha i pê sotto ä töa...

Renzo Ferrero – Dialetto di Genova

VOCI DI PIETRE

Nella pausa del pranzo, 

quando la gente ha i piedi sotto il tavolo, 

passando per caso 

per piazze deserte e vicoli scuri 

dei vecchi quartieri a ridosso del mare, 

in mezzo al silenzio si sente parlare. 

Voci di casa e parlate foreste, 

s' intrecciano tra i muri di case 

e di chiese, di portici e logge, 

botteghe e balconi... 

Campetto, San Lorenzo, Sarzano, San Matteo, 

Piazza Banchi, San Giorgio, 

la Commenda di Pré.

Sono le voci delle pietre, 

che raccontano le storie e le vecchie memorie 

del tempo passato, di secoli fa 

e danno voce a mercanti, 

banchieri, naviganti, 

nobili e dame con la loro servitù, 

soldati, pescatori, prigionieri levantini, 

galeotti, buonavoglia, malandrini, verdurai....

Rumore di zoccoli di cavalli e di muli, 

araldi con le trombe e schiere di ragazzini. 

Sono queste le voci che ognuno può sentire 

nelle piazze deserte e nei vicoli scuri, 

nella pausa del pranzo, 

quando la gente ha i piedi sotto il tavolo...