ASSOIGGIOU DE SCILENÇIO di Fiorenzo Toso

 

Assoiggiou de scilençio a-a mattin fito

paise che i mæ regòrdi t’arruxenti

d’unna infançia delongo ciù lontaña,

se poëse, un bello giorno, vixitâte

con pasci neuvi, comme navegante

desbarcou pe ventua in sce un meu foresto,

se poëse ammiâte con l’euggio chi core

pe-a primma vòtta in sciô profî seçioso

di bricchi che te sciaccan in sciâ riva

d’un mâ ch’o se desperde à l’infinio

comme condanna; se me poëse ingheugge

pe sti carroggi co-a mæ sacca veua

de speanse e inluxoin, comme emigrante

ch’o çerca un feugo açeiso ch’o ghe dagghe

paxe e resciöo pe unna magnâ de oe,

 

porriæ riescî à conoscite. Ma, vivo,

inte de mi t’ê apposo, e o no l’arriva

à scandaggiâse o cheu tanto che basta

un, da savei cös’o gh’asconde arreo.

Pe quello ti me manchi: comme t’ëi,

pe-e cöse ch’ò perduo inte tanti anni,

e comme t’ê, che no sò perintende

tanto t’ò drento, tanto ti m’ê drento.

 

 

 

Fiorenzo Toso – Lingua genovese

19.XII.21

 

 

ASSOLATO DAL SILENZIO

 

Assolato dal silenzio di primo mattino,

paese che i miei ricordi risciacqui

di un’infanzia sempre più lontana,

se potessi un giorno visitarti

con passi nuovi, come navigante

sbarcato per caso su molo straniero,

se potessi guardarti con l’occhio che scorre

per la prima volta sul profilo riarso

dei monti che ti schiacciano alla riva

di un mare che si disperde all’infinito

come condanna; se potessi avvolgermi

in questi vicoli col mio sacco vuoto

di speranze e illusioni, come emigrante

in cerca di un fuoco acceso che gli dia

pace e sollievo per una manciata di ore,

 

allora forse riuscirei a conoscerti. Ma, vivo,

stai conficcato dentro di me, e non si può arrivare

a sondare il proprio cuore fino a sapere

ciò che vi si nasconde nel profondo.

Per questo mi manchi: per ciò che eri,

per le cose che ho perso in tanti anni,

e per ciò che sei, che non riesco a percepire,

per quanto ti ho in me, per quanto sono in te.