NO VE SO DÎ A BELLESSA CÖS'A SEGGE di Fiorenzo Toso

 

Joaquín Sorolla y Bastidas, Paseo a orillas del mar (1909)

 

No ve so dî a bellessa cös'a segge

ni cattuâla tutta inta sò ësensa:

se me ghe preuvo o l'é pe quella urgensa

ch'ò inte de mi, pe quante me sorvegge.

 

Lascio che a luxe a parle, e a me consegge

comme fâ vive o gianco inta violensa

da raffega, e mesciâse contr'a-a densa

veitæ do bleu e de l'ænna e fâ mävegge.

 

Ma a bellessa sei voî: sei a bellessa

- unna bellessa stagna, rigorosa -

ch'a me sæxisce. Sei a contentessa

 

contegnua e tranquilla e scilensiosa

de passâ in mezo a-o vento co-a seguessa

da mæ presensa compiaxua e amosa.

 

 

 

Fiorenzo Toso – Lingua genovese

 

 

NON SO DIRVI COSA SIA LA BELLEZZA

 

Non so dirvi cosa sia la bellezza

né catturarla in tutta la sua essenza:

quando provo a farlo, è per l'urgenza

che ho in me, per quanto cerchi di contenerla.

 

Lascio che sia la luce a parlare, a consigliarmi

come far vivere il bianco nella violenza

di una raffica, a farlo muoversi sulla densa

verità del blu e dell'ocra, generando meraviglie.

 

Ma la meraviglia siete voi: siete la bellezza

- una bellezza solida, rigorosa –

che mi imprigiona. Siete la gioia

 

contenuta e tranquilla e silenziosa

di incedere nel vento, certe

della mia presenza compiaciuta e amorosa.