DEXEMBRE di Lorenzo Verrando

 

Prufümu d’öiu növu e manduìn

e purtugàli de l’ortu. In t’a cantina

u mustu u buje: üga de vermentin.

U grecale u sciüscia in scia-a mařìna,

 

i mařusi i se franse drent’i scögi,

e in ventu freidu u ven da-a tramuntana,

u gh’é neve in sci-u Fàudu, issandu i ögi.

U bataju za u cioca in t’a campana

 

ch’a se sente distante cand’a sona

e a n’invita in t’a geixa, pé pregà

au Rusaiu e ae laude da Madona

d’antiga üsanza, ch’i n’han mustrau cantà. 

 

E giurnèe i s’ascürsa cian cianin,

u l’è vexin Natale cu a nuvena..

“Regem venturum Dominum” au Bambin

in geixa e laude prima de fa' sena.

 

Cùi süchi de l’uřiva e du cartun

u presepiu cu-u muschiu u s’inandìa,

atruvàu pé-e riàne d’in valun,

e de fařina a cabàna a l’eřa garnìa,

 

üsu neve. Cu-e péguře e pastùi

San Giuseppe, u Bambin cun a Madona,

l’anse cu-u bö, inseme, tüti dui,

e in zampugnaru, lì vexin, cu sona.

 

E donne i l’aprepařa i raviöi:

öve, buraxe, gé cu in po’ de parmigian

(a m’aregordu cande nui fiöi

a-a terina du cén a gh’alunghèimu e man).

 

Vigilia: zà de Mezanöte a-a Messa

tüta l’Arma, in ta geixa illuminà,

e u Prevostu, in vestimenti bèli, a stessa

“Missa solemnis”, cun l’organu, a cantà

 

cu l’è nasciüu u Segnù e a-a fin

tüti inseme, omi, fiöi cu-e done

i se mete in riga pé baxià u Bambin,

pe dighe che e giurnèe u ne-e mande bone.

 

L’anu u l’è a-a fin, cum’a l’è andà a l’è andà,

u n’aresta ancù sempre ina speřansa

che e cose ciü bèle i n’è-e pòscie arivà

l’anu növu cu avansa.

 

  

Lorenzo Verrando – Dialetto di Arma di Taggia

 

 

DICEMBRE

 

Profumo d’olio nuovo e mandarini

Ed arance dell’orto. Giù in cantina

Ribolle il mosto: uva di vermentino.

Il grecale soffia sulla marina,

 

i marosi si frangono sugli scogli,

e un vento freddo vien da tramontana,

c’è la neve sul Faudo, alzando gli occhi.

Il battacchio batte dentro la campana

 

Che si sente distante quando suona

E c’invita alla chiesa per pregar

Al rosario e le laudi alla “Madona”

All’uso antico che imparammo a cantar.

 

S’accorcian le giornate pian pianino

È tempo del Natale la Novena.

“Regem venturum Dominum” al Bambino,

Cantavamo in chiesa prima della cena.

 

Coi ciocchi dell’ulivo e col cartone

al presepio col muschio si dà vita,

Raccolto nelle rive d’un vallone

E la capanna di farina era guarnita,

 

come neve. Con pecore e pastori,

San Giuseppe, il Bambino e la Madonna

L’asino, il bue e messo lì di fuori

Lo zampognaro per suonar la nanna.

 

Le donne a preparare i ravioli:

uova, biete, boraggine e un po’ di parmigiano.

(ricordo ancora quando noi figlioli

al vaso del ripieno allungavam la mano).

 

 

Vigilia: già di Mezzanotte a Messa

Gli Armaschi in chiesa tutti a celebrare

E il Prete in paramenti belli la stessa

Messa solenne con l’organo, a cantare

 

Che Gesù venne tra noi piccino.

Poi padri e madri con i loro figli

Vanno a baciare il Dio fatto Bambino,

a pregar di liberarli dai perigli.

 

L’anno è finito: è andata com’è andata.

Rimane ancora sempre la speranza

Che una vita migliore a noi venga portata

L’anno nuovo che avanza.