U BALUN DE PAPE’ di Franco Bianchi

U ghe vuxeva pocu a demuòse

ina votta, ae fèste de paise.

A’a matin a andexeimu tütti a’a messa,

c’a l’ea in latin, e a nu capimu stissa!

E pœi a purtò u Cristu in prescesciùn

cuscì i pecai in andexeva in prescrisiùn.

Chi u l’ea bon u puxeva muntò

in sima au campanin, pé bataiò.

Dupigernà a se truvœimu in ciassa

tüti vestii daa festa, ina belessa

ma u mumèntu ciü bèlu da vé

u l’ea quonde u balun u muntova in sé.

U l’ea fau de papé, chelu balun,

u l’axeva a furma d’in sücun

cu in’agnima de fi fèru rundu.

Seràu in sima, ma avèrtu in tu fundu

in ch’in strasun, (drentu a in furnelettu)

bagnàu de alcol asesu in ch’in brichettu.

Cuscì l’oia in tu balùn a se rescaudova

e ciü legéu, cianin, u se issova.

Nui a mioimu in cu i œggi sbanài

a bucca averta, mezi abelinài.

Numma che serte votte, doppu in po’

u vèntu u u faxeva barzelò

alùa e sciamme i rivova au papé,

e u balun u s’asendeva in sé:

i ghe daxeva fœgu in t’in mumèntu

e u se bruxiova tüttu, sacramèntu!

Nui fiœi a ghe restoimu mò

perché a festa a l’ea meza ruvinò…

Franco Bianchi – Dialetto di Diano Castello

I Classificata al Concorso “Bellissimi versi” – Edizione 2017

LA MONGOLFIERA DI CARTA

Ci voleva poco per divertirsi

una volta, alle feste di paese.

Al mattino andavamo tutti a messa

che era in latino, e non capivamo niente!

E poi a portare il Cristo in processione

così i peccati cadevano in prescrizione….

Chi era capace, poteva salire

sul campanile, per battagliare.

Al pomeriggio ci incontravamo in piazza

tutti vestiti a festa, eravamo molto belli

Ma il momento più bello da vedere

era quando la mongolfiera saliva in cielo.

Era fatta di carta, la mongolfiera

e aveva la forma di una grossa zucca

con l’anima di filo di ferro.

Era chiusa in cima ma aperta sul fondo

Dove c’era uno straccio (dentro un piccolo fornello)

imbevuto di alcol e acceso con un fiammifero.

Così l’aria dentro la mongolfiera si riscaldava

E diventata più leggera, si alzava.

Noi guardavamo con occhi spalancati

e la bocca aperta, come allocchi.

Solo che certe volte, poco dopo,

il vento la faceva oscillare,

le fiamme raggiungevano la carta

e la mongolfiera prendeva fuoco:

si accendeva in un momento

e bruciava tutta, porca miseria!

Noi ragazzi ci rimanevamo male

perché la nostra festa era mezza rovinata…