SAN ZANE di Guidu de Cetta

San Giovanni dei Prati - Molini di Triora (Im)

San Zane a l’è ün-a festa

ch’a nu se pò scordòo,

a l’è sempre staa attraente

e besögnava andòo.

Adesso a nu l’è ciü cume prima,

quand’u s’andeixava a pè

e nu gh’èa inquinamentu da benzina.

 

Besögnava aisolse

aa mattin prestu,

prima che u spuntasse u sue,

per cammiòo in poco ciü cuu frescu

e nu bagnorse tantu de suue.

 

Sti anni a strada a passava a fie de colla,

cun tanti munta e caa a feixava corda molla.

Pöi del quaanta amu foitu a strada

növa a meggia costa,

ch’a restava ai Franzesi in pocu ciü nascosta.

 

Quell’annu cun a Franza a gh’èa a guerra;

i paisi i suo restoi deserti, i abitanti i sun sfulloi.

U gh’è restau sulu cheiche gruppu

de operai perché già militarizzoi.

Anche a festa de San Zane lasciü a nu gh’èa.

 

Prima a culletta a l’èa liscia da parte de levante,

i böschi i èa a valle, lasciü nu gh’èa ciante;

a geixa e u Santu i se veixava da distante,

u prau u l’è-a ciü grande

e de gente u gh’en steixava nu so quante.

 

Cetta, u Peallu e Gavanu i sun i paisi au santuariu ciü veixin

ma tanta gente a vegnava dau Creppu, Curte, Andagna e dai Muin.

Da Triöa u Santu u se pörtava a spalle,

passando da San Benardin, avanti pèe Figalle;

Cian de Vunda, Cetta Suttan-a, Pöggiu Longu, Geixetta de Buin

e cun in autra tappa u s’arrüvava aa fin.

 

I Castelluzzi i vegnava sempre in tanti.

Franzé Allavena diitu La manica

cuu carru u portava l’ustaia:

gazöse, aranciate, birra e vin.

I sei figliöi cume aiutanti, i enciava i götti

e u se bevava tütti in allegria.

 

U gh’èa tanti banchi cun i fantin,

statüette douze fòo de ciüccau fin;

allegrezza per grandi e per peccin,

ch’i se spunciava tütti per esse ciü veixin.

 

I giuveotti ae giuven-e

u fantin u ghe regalava,

pöi ciü in là versu u böscu i s’appartava.

A brazzettu o per man i cammiava,

pöi all’umbra de ün-a cianta i caignava.

 

A gente de ögni paise, u prève in testa,

i giava inturnu aa Geixa a fòo a nuven-a

e tanti grüppi in fia i furmava in-a caen-a.

Quando cheiche grüppu u se desfava,

sübitu in autru grüppu u se furmava.

 

U s’andeixava avanti cuscì

fin versu unze e meggia o meggiudì,

pöi u l’èa l’ua de fòo pich nich;

tütti i cunuscenti i te invitava:

ven-i a mangiòo da mì.

 

L’appetitu u gh’èa e a mangiòo u se cumenzava:

pasta de risu, cuigliu, pan e pumata lì u se consumava.

Certamente u nu mancava u vin

e da beve u s’en öffrava a chi passava lì veixin.

Cun quelli che i mangiava accantu

u se scangiava bevande, merende e tüttu quantu.

 

Pöi certi anni u s’avenxiava i nivuazzi,

cun tron-i e lampi e certi sguazzi:

allavue i se libeava u paaoigua ligau au cavagnu.

U se razzugnava tüttu ma ascoixi sempre u se feixava u bagnu.

 

Tütti i se avviava versu ca’,

u prau u restava desertu. E quellu là?

Davanti aa Geixa u gh’èa ancoo cheiche embriagu,

che da sulu u se dixiava: adesso m’en vagu.

 

Cuscì sel bagnau a festa a l’è fenia,

sutte l’oigua a manca sempre a solita allegria.

L’appuntamentu u l’è per st’annu chi ven-i,

cun a speranza che sempre tüttu u vaghe ben-i.

 

 

 

Guidu de Cetta – Dialetto di Cetta

Da Le stagioni di Triora, anno XI, n. 3

 

SAN GIOVANNI

 

San Zane è una festa

che non si può scordare,

è sempre stata attraente

e bisognava andare.

Adesso non è più come prima,

quando si andava a piedi

e non c’era inquinamento da benzina.

 

Bisognava alzarsi/alla mattina presto,

prima che spuntasse il sole,

per camminare un po’ di più con il fresco

e non bagnarsi tanto di sudore.

 

Gli anni passati la strada passava sul colle,

con tanti saliscendi faceva tiramolla.

Poi del quaranta abbiamo fatto la strada

nuova a mezza costa,

che restava ai Francesi un po’ più nascosta.

 

Quell’anno con la Francia c’era la guerra;

i paesi sono rimasti deserti, gli abitanti sono sfollati.

E rimasto solo qualche gruppo

di operai perché già militarizzati.

Anche la festa di San Zane lassù non c’era.

 

Prima il colle era liscio dalla parte di levante,

i boschi erano più a valle, lassù non c’erano piante;

la chiesa e il Santo si vedevano da distante,

il prato era più grande

e di persone ce ne stavano non so quante.

 

Cetta, Perallo e Gavano sono i paesi al santuario più vicini

ma tanta gente veniva da Creppo, Corte, Andagna e da Molini.

Da Triora il Santo si portava a spalle,

passando da San Bernardino, proseguendo per Figalla;

Pian di Vunda, Cetta Sottana, Poggio Lungo, Chiesetta di Buin

e con un’altra tappa si arrivava alla fine.

 

I Castelluzzi venivano sempre intanti,

Francesco Allavena detto La manica

con il carro portava l’osteria:

gassose, aranciate, birra e vino.

I suoi figli come aiutanti, si riempivano i bicchieri

e si beveva tutti in allegria.

 

C’erano tanti banchi con i fantin,

statuette dolci fatte di zucchero fine;

erano allegria per grandi e per piccini,

che si spingevano per essere più vicini.

 

I giovanotti alle ragazze

il fantin regalavano,

poi più in là verso il bosco si appartavano.

A braccetto o per mano camminavano,

poi all’ombra di una pianta amoreggiavano.

 

La gente di ogni paese, il prete in testa,

girava attorno alla Chiesa per fare la novena

e tanti gruppi in fila formavano una catena.

Quando qualche gruppo si disfaceva,

subito un altro gruppo si formava.

 

Si andava avanti così

fin verso le undici e mezza o mezzogiorno,

poi era l’ora di fare pic-nic;

tutti i conoscenti ti invitavano:

vieni a mangiare da me.

 

L’appetito c’era e a mangiare si cominciava:

pasta di riso, coniglio, pane e pomodoro lì si consumavano.

Certamente non mancava il vino

e da bere si offriva a chi passava lì vicino.

Con quelli che mangiavano accanto

si scambiavano bevande, viveri e tutto quanto.

 

Poi certi anni si avvicinavano i nuvoloni,

con tuoni e lampi e certi rovesci:

allora si liberava il parapioggia legato al cestino.

Si raccoglieva tutto ma quasi sempre si faceva il bagno.

 

Tutti si avviavano verso casa,

il prato restava deserto. E quello là?

Davanti alla Chiesa c’era ancora qualche ubriaco,

che diceva tra sé: adesso me ne vado.

 

Così sul bagnato la festa è finita,

sotto l’acqua manca sempre la solita allegria.

L’appuntamento è per il prossimo anno,

con la speranza che tutto vada sempre bene.