U LAGHELU di Costanza Modena

 

Me maire a l’eira scì straurdinaria!

De longu a me dizieva: “Dame a mentu,

magara ti averai a lavandara

e a serva, pruntu a to cumandamentu.

 

Ma tü ti duverai savé fa tütu,

lavà, stirà. Cuixì, fa da mangià:

sulu alura ti serai da respeità,

ina vera padruna intu so scitu!”

 

Cuscì a me mandava da u laghelu

cun trei mandii e in aciügaman

e in tocu de savun che, noma elu,

u l’eira ciü grossu da me man!

 

U laghelu, u l’eira ina vascheta

de simen, ben diviisu in due metà,

pe’ insavunà, e pöi pe’ arexentà

ciü vote, fin che a roba a l’eira neta.

 

A me ghe demuravu, in te l’estai,

e de lavà a nu finivu mai;

a me bagnaivu cume in marinà

incapelau da in’unda in mezu au mà.

 

Oh! cume u l’eira belu tapulà

in te chel’aiga tüta insavunà,

mancu a l’avesse lavau pe’ ina famija

in müju de ransuusa giancheria.

 

U savun, caiche vouta, u me sgurava

da a man e u andaixeva a fundu.

Mi a criivu a me maire, ch’a pasava:

“U m’è turna scapau u savun, cramundu!”

 

Cu’ a vangheta, sercandure a l’urbeta,

ela a u pescava. Dai sgrabi ch’u l’aixeva,

 stu tocu de savun, cume ina feta

de furmagiu griviera u me paixeva.

 

 

 

Costanza Modena – Dialetto di Sanremo

 

 

IL LAVATOIO

 

Mia madre era così straordinaria!

Mi diceva sempre: “Ascoltami,

magari avrai la lavandaia

e la donna di servizio, pronte ai tuoi ordini.

 

Ma tu dovrai saper fare tutto,

lavare, stirare, cucire, far da mangiare:

solo allora sarai da rispettare,

una vera padrona di casa!”

 

Così mi mandava al lavatoio

con tre fazzoletti e un asciugamano

e un pezzo di sapone che, solo lui,

era ben più grande della mia mano.

 

Il lavatoio era una vaschetta

di cemento, ben divisa in due metà,

per insaponare e poi per risciacquare

più volte, fin che la biancheria era pulita.

 

In estate mi ci divertivo

e non finivo mai di lavare;

mi bagnavo come un marinaio

incappellato da un’onda in mezzo al mare.

 

Oh! come era bello sguazzare

in quell’acqua tutta insaponata,

neanche avessi lavato per una famiglia

un mucchio di biancheria sporca.

 

Il sapone, qualche volta, mi scivolava

dalla mano e andava a fondo,

e io gridavo a mio madre, che passava:

“Mi è di nuovo scappato il sapone, accidenti!”

 

Con la vanghetta dei garofani, cercando nell’acqua torbida,

lei lo pescava. Dai buchi che aveva

quel pezzo di sapone, mi pareva

una fetta di formaggio gruviera.