ZEUGHI A L'AJA AVERTA di Renzo Ferrero

Fæti de sprescia i compiti da scheua

sotto l' attenta vixon de mæ mamâ,

dæta 'na ripassâ a-o “pio bove”

xeuava de corsa zù pe-a scaa

comme se avesse 'n furgao a-o panê

p' andâ con i masc-cetti da mæ etæ

a zûgâ pe-a stradda a l' aja averta

con lippa, ziàrdoa, biglie e figûrinn-e.

Con çercetti, corde pe sätâ, e bûgatinn-e

pe conto sò zûgava e figgette.

Ogni tanto però ûnn-a de lö

a vegniva a busticcâ niatri figgieu

pe poi scappâ coverta de sberleffi,

Ma quande capitava o reverso,

scappavan tûtte sciatæ chì e là

tra trilli e strilli acûti a no finî.

comme quande o fuìn o intra into pollâ

Tûtti i giorni capitava poi

che invidie, despëti e gioxïe

davan feugo a rattelle e barûffe

che s' asmortavan però 'n te 'n quarto d'ôa.

Tempi passæ, demôe d' allôa...

Ôua, zà grendi a sett' anni,

serræ inta stansiëta co-o P.C.

zeugan con amixi sconosciûi

distanti tra de lö miggiæ de miggia

sensa l' emoscion do zeugo a l'aja averta

risate, liti tra figgieu, o griffo e croxe,

casci 'nti stinchi, tiäte pe-i cavelli

pe dâse poi a bèrta a viva voxe!

Renzo Ferrero – Dialetto di Genova

GIOCHI ALL' ARIA APERTA

Fatti di corsa i compiti di scuola sotto

l'attento sguardo di mia madre,

data una ripassata al “pio bove”,

volavo di corsa giù per la scala

(come se avessi il fuoco al sedere)

per andare con i maschietti della mia età

a giocare per la strada all' aria aperta

con lippa, trottola, biglie e figurine.

Con i cerchietti, corde per saltare e bamboline,

giocavano per conto loro le bambine.

Ogni tanto però una di loro

veniva a stuzzicare noi ragazzi,

per poi scappare coperta di sberleffi,

ma quando capitava il contrario,

scappavano tutte agitate qua e là

fra trilli e strilli acuti a non finire

come quando il furetto entra nel pollaio,

Tutti i giorni capitava poi

che invidie dispetti e gelosie

davano fuoco a liti e baruffe

che si spegnevano poi in un quarto d' ora.

Tempi passati, giochi di allora....

Ora già grandi a sette anni,

chiusi nella stanzetta col P.C.,

giocano con amici sconosciuti,

distanti tra loro migliaia di miglia

senza l'emozione del gioco all' aria aperta,

risate, liti tra ragazzi, il testa o croce,

calci negli stinchi, tirate di capelli,

per darsi poi la baja a viva voce !