A TURRE DE BASIGLIU di Roberto Rovelli

 Torre Maggia a La Mortola

Ani fa, in furèstu,

in artista famusu,

u s’ava acatàu, méża derrucà,

a vecia Turre de Basigliu.

Avù, bèn tegnüa e tüta arangià,

a se ciama a “Turre Maggia”,

cuscì i me dixe.

– Scignuria, scià me scüse,

ma ‘stu nome pe’ dabon u nu’ me va! –

Da figliö ava passàu mai tante ure

giügandu int’a sciumbria

de ‘ste vecie müraglie de pria:

in antigu castélu misteriusu

cu’a bèla principessa

in preixùn int’a turre

o in veciu forte arrampegàu

sciü e roche d’a cola

pe’ difende u paìse dai Türchi.

A l’avirùn i gerbi d’I Culeti,

u “Far West” int’a mei imaginaçiun,

i l’eira cen de màneghe d’Indiai

grami, sarvàighi e tüti pintài

cume int’i giurnalìn a fümeti.

Ancöi u l’è tütu scangiàu:

l’autustrada a s’à purtàu via I Culeti,

asseme ai custi de ginestra, i agàixi e i brüghi.

De l’antiga cola u gh’è restàu ascaixi rèn,

numà ina terca desfegurà dae ferìe;

gh’è inscì ina strada de sgruttu e de prie

ch’a se pö fà in machina fin passàu i Mureti.

Scusa derré a in purtà de ferru

e a ina cinta de reticulati e pagliassui,

a vecia Turre a paresce in preixùn,

furèsta cume u sòu patrùn.

– Scignuria, scià me scüse,

d’i mei regòrdi numà u nome u l’è restàu…

pe’ pieixé, scià nu’ me u porte via! –

Roberto Rovelli – Dialetto de La Mortola

LA TORRE DI BASIGLIO

Anni fa, un forestiero,

un artista famoso,

si era comprato, mezza diroccata,

la vecchia Torre di Basiglio.

Adesso, ben tenuta e tutta aggiustata,

si chiama la “Torre Maggia”,

così mi dicono.

- Vossignoria, lei mi scusi,

ma questo nome seriamente non mi va! -

Da ragazzino avevo trascorso tante ore

giocando nell’ombra

di questi vecchi muri di pietra:

un antico castello misterioso

con la bella principessa

in prigione nella torre

o un vecchio forte arrampicato

sulle rocche del colle

per difendere il paese dai Turchi.

Attorno, gli incolti de I Coletti,

il “Far West” nella mia immaginazione,

erano pieni di bande d’Indiani

cattivi, selvaggi e tutti dipinti

come nei giornalini a fumetti.

Oggi è tutto cambiato:

l’autostrada s’è portata via I Coletti,

assieme ai cespugli di ginestra, i ginepri e le eriche.

Dell’antico colle c’è rimasto quasi nulla,

soltanto un luogo roccioso disfigurato dalle ferite;

c’è persino una strada di terra argillosa e di pietre

che si può fare in macchina fin oltre i Moretti.

Nascosta dietro a un cancello di ferro

e ad una cinta di reticolati e stuoie di canna,

la vecchia Torre sembra in prigione,

forestiera come il suo proprietario.

- Vossignoria, lei mi scusi,

dei miei ricordi soltanto il nome è rimasto…

per piacere, non me lo porti via! -