INA PANSÀ DE CEREIXE DÜRAIXE di Costanza Modena

 

Me barba u l’aixeva ina cereixa

ch’a ne faixeva corbe tüti i agni,

cereixe grosse, calità düraixa;

nui fijöi a ne magiaimu di cavagni.

 

I axeva belu dì: “i ve fan mà!

Desguvernai, u ne basta ina manà!”

Figüramuse nui, canta alegria,

sute a sta cianta, a a so sciumbrìa!

 

Cun me cuixina a se semu arampinae

surve e rame ciü grosse, caregae

de cereixe tüte negre, tüte bele;

a l’aixevimu mae e facia ben murele.

 

Spüando osci e mitrajandu inturnu,

a ripuliimu e rame a reu a reu,

a vuixevimu sta lasciü pe tütu u giurnu:

duve a gardaimu, cereixe a sgaféu!

 

Cantandu cume ciügare, cuntente,

a nu pensaimu a chelu ch’u vegniva.

Fina se caiche segnu u s’avertiva

A u remandaimu inderé cu’ a mente.

 

E cande pöi a a fin semu carae 

a se sentiimu cume imbriaghe.

A pansa a ne stirava da s-ciupà,

cun ina gran inveza de andà a cà.

 

In ta cuixina, apugiae a a credensa,

u n’è tucau de fa ina penitensa:

in’amara camamila che, a l’udù,

a racaimu fina l’agnima du Segnù.

 

Pe’ in po’ de giurni u n’è passau a gura!

Ina cereixa… ma che anguscia, ancura!

Me sö a ne cujunava cun marissia:

“I e vurei due cereixe? Che delissia!”

 

 

 

Costanza Modena – Dialetto di Sanremo

 

 

UNA SCORPACCIATA DI CILIEGe DURONE

 

Mio zio aveva un ciliegio

che faceva cesti di frutti tutti gli anni,

ciliegie grosse, di qualità durone;

noi ragazzi ne mangiavamo dei cestini.

 

Aveva un bel dire: “Vi fanno male!

Esagerati, accontentavi di una manata!”

Figuriamoci noi, quanta allegria,

sotto a quella pianta, all’ombra.

 

Con mia cugina ci siamo arrampicate

sui rami più grossi, carichi

di ciliegie tutte nere, tutte belle;

avevamo mani e faccia macchiate di sugo nero.

 

Sputando gli ossi e mitragliando intorno,

ripulivamo i rami completamente,

volevamo stare lassù tutto il giorno:

dovunque guardavamo, ciliegie a volontà.

 

Cantando come cicale, contente,

non pensavamo a quello che ci aspettava.

Anche se qualche segno già si avvertiva

lo respingevamo indietro con la mente.

 

E quando poi alla fine siamo scese

ci sentivamo come ubriache.

La pancia era tesa da scoppiare,

(avevamo) una gran voglia di andare a casa.

 

In cucina, appoggiate alla credenza,

ci è toccato fare penitenza:

un’amara camomilla che, solo a sentirne l’odore,

vomitavamo perfino l’anima del Signore.

 

Per un po’ di giorni ci è passata la gola!

Una ciliegia… ma che nausea, ancora!

Mia sorella ci prendeva in giro con malizia:

“Le volete due ciliegie! Che delizia!”